أولا حمد لله ع السلامة يا أحلى نوسة ، نورت المنتدى ..
وثانيا .. مش عارفة للمرة الكام باتفق معاكي .. بس انا فعلا متفقة معاكي .. الحياة النهارده فعلا مليانة بالمتناقضات الغريبة لدرجة إنها .. مابقتش غريبة..
عارفة ، وانا صغيرة ، كنت باحب أقيم مع نفسي حوارات ، أسأل أسئلة واحاول ألاقي الرد عليها ، ومن ضمن الأسئلة دي .. السؤال ده:
امتى الواحد يقدر يعيش سعيد ؟
وكانت الإجابة :
لما يعيش في أمان ..
طيب ، وإمتى الواحد يحس بالأمان؟
وكانت الإجابة :
لما ماحدش يؤذيه..
طيب وإمتى الناس تبطل تؤذيكي؟
وكانت الإجابة :
لما تحبك ..
فلما عرفت إني عشان أعيش سعيدة لازم الناس تحبني ، دعيت ربنا إنه يحبب فيه الناس ..
بس لما كبرت ..
غيرت رأيي تماما ..
وحسيت إني ماكنتش شايفه الأمور بوضوح
ليه ؟؟؟؟؟؟؟؟؟
لأن أكثر أذى تعرضت ليه في حياتي - وماتستغربيش - كان من ناس بتحبني ، وبسبب إنها بتحبني....
يعني فيه ناس تحبك لدرجة انها مش عاوزاكي تعرفي حد غيرها
وناس تحبك لدرجة انها توقع بينك وبين كل حد يقرب منك عشان تكوني ليها لوحدها
وناس تحبك لدرة انها تفركش لك مواضيع جواز عشان متبعديش عنهم
وناس تحبك لدرجة انها تحاول بكل الطرق تغيرك عشان تكوني نسخة تانية منهم عشان يعرفوا يتعاملوا معاكي من غير مشاكل..
وناس تحبك لدرجة انهم .. يكرهوا حبهم ليكي .. فيكرهوكي :!:
والله ده حصل ..
وحاجات من دي كتير ..
الخلاصة اني اكتشفت لما كبرت ان مش هو ده مفتاح السعادة
مفتاح السعادة الحقيقي .. في الإيمان القوي ، والعقل الناضج، والفطرة السليمة والسلوك القويم..
يعني لو الناس حبتك تحبك بعقل ، ولو كرهتك ماتحاولش تؤذيكي.. لأانم موزونين في الفكر والإحساس ..
هم مش بيقولوا :" عدو عاقل خير من صديق جاهل "..
المشكلة فعلا في المبادئ الغلط اللى بتخلي الناس تتصرف بشكل غير سليم ، حتى مع الناس اللى بتحبهم .. هو مش فيه ناس قتلت ولادها علشان خايفة عليهم من الفقر؟!!!!!!!!!!!! هم دول كانوا كرهوا ولادهم ؟ أبدا ، لكن تفكيرهم غير موزون ، وإيمانهم ضعيف..
الحياة فعلا مليانة بالمتناقضات ..
وأحب أقول للأستاذة .. إن كل واحد فينا ، رأيه بيكون نتاج خبرته الشخصية ، أو تجارب المحيطين بيه ، ولأن خبراتنا مختلفة في الحياة ، وكمان محيطنا الاجتماعي مختلف ، من الطبيعي جدا إننا نختلف في الرأي ، وهذا الاختلاف ضرورة لإقامة حوار بين البشر ، ولو ماكانتش هذا الاختلاف موجود ، ماكانش حايبقى فيه حوار بين الناس أصلا ، ولزومه ايه بقى ، ماحنا متفقين .. وللا إيه يا أستاذة؟
الرئيسية 
